About Stichting Bloedbank Aruba
SBA ta existi den su forma actual for di 1 januari 1981 y for di november 2007 e ta forma parti di Dr. Horacio Oduber Hospital, pero cu su propio identidad.
Tur contesta ariba pregunta y resultado di testnan cu Bloedbank haci ta confidencial.
Tags
Historia Stichting Bloedbank Aruba
E iniciativa pa cuminsa cu e banco di sanger na Aruba a bin for di e ex-director y ciruhano anterior di hospital esta Dr. Frans Hage. E la mira e necesidad di centralisa tur actividad di transfusion di sanger den un solo organisacion. Pa por establece e banco di sanger e la aserca e internista Dr. Osvaldo Anaya, internista, pa coordina e actividadnan. A traves di Dr. Anaya su esfuersonan, finalmente e organisacion Stichting Rode Kruis Bloedbank a wordo funda na 1981. Dr Anaya a fungi como director medico di Bloedbank pa hopi aña. Ela wordo asisti door di Señora Vivian Lampe cual tabata e manager.
E prome localidad di e banco di sanger tabata situa den un di e cambernan den e edificio di e apartament di e enfermeranan. Despues cu e departamento di fisioterapia a muda pa e edificio nobo di rehabilitacion, e banco di sanger a muda na e localidad bashi den hospital. Despues di varios aña cu ayudo di Union Europeo un facilidad mas moderno a wordo construi riba e tereno di hospital. E banco di sanger a muda pa e edificio aki na aña 1997.
E organisacion Lions Club of Aruba tabata semper un fiel colaborador di e banco di sanger durante e ultimo 50 añanan. E club a contribui door di organisa regularmente cu ‘blood drives’ y door di donacionnan.
Na 2007 e statuut di e banco di sanger a wordo revisa y e nomber di e fundacion a wordo cambia pa Stichting Bloedbank Aruba. Bou di e statuut nobo e hunta di asesornan y hunta di directiva di e hospital a bira tambe e hunta di asesornan y hunta directiva di Stichting Bloedbank Aruba. E maneho diario di e banco di sanger a wordo asigna na un manager y un coordinador.
Na september 2008 un acuerdo di cooperacion a wordo firma entre Stichtinh Bloedbank Aruba y Stichting Rode Kruis Bloedbank Curaçao, cu e proposito pa asisti e banco di sanger di Aruba cu e parti principal di su programa operational. Den cuadro di e acuerdo aki e director di Stichting Rode Kruis Bloedbank Curaçao a wordo apunta como medico supervisor di e banco di sanger na Aruba pa atende tur asunto di relacion medico.
E banco di sanger a pasa door di un reorganisacion extensivo dedes 2007 te cu awor cu e proposito final di alcanza e metanan y normanan di GMP y di e forma aki cumpli cu tur e rekisitonan internacional di calidad pa un banco di sanger.
